រាល់ការប្រាស្រ័យស្ដីទាក់ទង
ទំនាក់ទំនងតោងតម្រូវ
អណ្ដាតនេះហើយអ្នកនាំផ្លូវ
ពាក្យខុសឬត្រូវនៅលើវា។
គួរគិតឲ្យមាំមុននិយាយ
ទម្លាយវាចាហាសន្ទនា
ទៅកាន់អ្នកផងគ្រប់វេលា
ទើបវាពុំមានភ្លាត់វាចា។
រនាបបាក់យករនាបជួស
សម្ដីជ្រុលជ្រួសហួសហាថា
ទោះខំសុំទោសមិនអស់ការ
គង់នៅសង្កាជាពុំខាន។
អណ្ដាតជាអាទិ៍ឲ្យសុខទុក្ខ
រាល់ថ្ងៃទៅមុខមកដល់ប្រាណ
ហេតុនេះគប្បីស្មឹងស្មាធិស្មាន
ប្រមាណឲ្យច្បាស់មុននឹងស្ដី។
No comments:
Post a Comment