ឧបករណ៍ជាងដែកមានមិនខ្វះ
សម្រាប់ប្រើប្រាស់ប្រចាំថ្ងៃ
រណាញញូពូថៅដៃ
ដែកស្បែងកន្ត្រៃច្រើនសព្វសារ។
ទុកចោលរាយប៉ាយមិនប្រយ័ត្ន
លិចកប់បង់បាត់ខ្ចាត់អសារ
ឬមានអ្នកខ្ចីយកទៅណា
ដល់ខ្លួនត្រូវការកាច់នឹងដៃ។
រីជាងកាត់សក់កញ្ចក់ឆ្លុះ
ឱនងើបឡើងចុះឃើញរាល់ថ្ងៃ
សក់ក្បាលខ្លួនឯងវែងក្រាស់ក្រៃ
កន្ត្រៃរវល់កាត់ក្បាលគេ។
យកលេសថាគ្មានអ្នកកាត់ឲ្យ
រង់ចាំថ្ងៃក្រោយពេលទំនេរ
ចាំកាត់ឲ្យបានស្អាតបាតនឹងគេ
តែពុំសូវទេនៅជាក់ស្ដែង។
ឧបមេយ្យសេដ្ឋីមានទ្រព្យា
វេលាត្រូវការខ្វះអំបែង (១)
ចង់លីងអំបុកខ្ចីគេឯង
នេះថ្លែងដូចពាក្យសុភាសិត។
(១) សុំរកអានរឿង «សេដ្ឋីខ្វះអំបែង»
នឹងបានយល់
អំពីរឿងនេះ។
No comments:
Post a Comment